COP17: Зохион байгуулагч, ажилтнуудын хөтөч

Олон оролцогч, төлөөлөгчдийн хувьд та COP17-ийн нүүр царай бөгөөд тэдний уулзах анхны Монгол хүн байх болно. Мянга мянган жилийн турш уудам тал нутгийн иргэд танихгүй гийчнийг дулаан сэтгэл, хоол унд, уриалган сэтгэлээр угтан авсаар ирсэн. Энэхүү өв уламжлалыг дэлхийд таниулах боломж гарч ирж байна.

Төлөөлөгчийг газарчлах, асуултад хариулах, орчныг цэвэр цэмцгэр байлгах зэрэг харилцаа бүр нь Монгол Улсыг чадамжтай зохион байгуулагч, олон улсын итгэлтэй хамтрагч, арвин соёлтой үндэстэн гэж харагдахад хувь нэмэр оруулна.

• Соёлтой найрсаг байдал: Зочдыг тэвчээртэй, нээлттэй хандлагаар угтаарай.
• Идэвхтэй дэмжлэг: Хэн нэгэн төөрсөн эсвэл тусламж хэрэгтэй мэт харагдвал асуухаас нь өмнө тусламж санал болгоорой.
• Найдвартай байдал: Асуултын хариултыг мэдэхгүй байвал албан ёсны эх сурвалжаас баталгаатай мэдээлэл олж хариулаарай.
• Хүртээмжтэй байдал: Оролцогч, төлөөлөгч бүр өөрийгөө үнэ цэнтэй, хүндлэл хүлээсэн нэгэн гэж мэдрэхэд нөхцөл байдлыг бий болгож ажиллаарай.

Үйл ажиллагааны үндсэн ажлын хэл нь англи хэл боловч оролцогчид хэл болон соёлын олон ялгаатай газраас ирсэн гэдгийг мартаж болохгүй.

• Ярианы өнгө аяс: Тайван, дунд зэргийн хурдаар яриарай.
• Хар ярианаас зайлсхийх: Ойлгомжгүй нутгийн хэллэг, хэлц үг, хар ярианы хэллэг ашиглахаас зайлсхийгээрэй.
• Хэлсэн зүйлийг баталгаажуулах: Оролцогчийн асуултыг заавал баталгаажуулж асуугаарай. Асуултыг ойлгоогүй бол соёлтойгоор дахин асуух эсвэл ахлагчаасаа тусламж хүснэ үү. Таамаглахаас зайлсхийгээрэй.
• Идэвхтэй сонсох: Ялангуяа ачаалалтай үед оролцогчийг ярьж дуустал нь тэвчээртэй сонсоорой.

• Алгаа дэлгэж заах: Хуруугаараа чичлэн заах нь олон соёлд соёлгүйд тооцогддог. Чиглэл заахдаа алгаа дэлгэж заана уу.
• Зүйлсийг өгөх, авах: Энгэрийн тэмдэг, газрын зураг, баримт бичиг, ус өгч авахдаа хүндэтгэл үзүүлэн баруун гараараа эсвэл хоёр гараараа өгч авна уу.
• Нээлттэй байдал: Харилцахдаа нүд рүү нь харж, чин сэтгэлээсээ инээмсэглэж, стресстэй үед ч тайван байдлаа хадгална уу.

COP17 нь дэлхийн байгаль орчны чухал асуудлуудыг шийдвэрлэхээр бүх дэлхийн хүмүүс цуглардаг талбар юм.

• Соёлын хүндэтгэл: Иргэншил, хүйс, нас, шашин шүтлэгээс үл хамааран оролцогч бүртэй адил тэгш харилцана. Хувийн орон зай, мэндчилгээний хэм хэмжээ олон улсад өөр байдгийг анхаараарай.
• Байгаль орчны үнэт зүйлс: Монголчуудын тал нутаг, уул ус, гол мөрөнтэйгээ харилцах соёл гүн гүнзгий. Хог ангилах, ус дүүргэх цэгийг ашиглах, цаасны хэрэглээг багасгах, эрчим хүч хэмнэх замаар үлгэр жишээ үзүүлээрэй.

Зочидтой Монгол өв соёлоо үнэн зөв, найрсгаар хуваалцахаас бүү татгалзаарай.

• Нүүдэлчин соёл, монгол гэр, тогтвортой бэлчээрийн ашиглалт
• Наадам, бүргэдийн баяр, үндэсний спорт
• Уламжлалт урлаг: Хөөмий, Морин хуур, каллиграфи (уран бичлэг)
• Монгол орны байгаль, үндэсний цэцэрлэгт хүрээлэн, байгаль хамгааллын зорилтууд

Уламжлалт ёс заншлын зөвлөмж (зочид төлөөлөгчдөд хэлж зөвлөөрэй):

Гэрт орох ёс (Павильоноор зочлох ба аялах үед)

• Гэрийн эзэн угтан авч, суудал зааж өгөхийг хүлээх.
• Гэрийн босгон дээр гишгэхгүй байх.
• Гэрийн багана болон голомтыг нар зөв тойрч алхах.
• Хоёр баганын дундуур алхахгүй, эд зүйлс дамжуулахгүй байх.
• Барьсан цай, идээнээс амсах.

Түүх соёлын болон сүсэг бишрэлтэй холбоотой газрууд (Хийд, Овоо, Дурсгалын цогцолбор)

• Тохиромжтой хувцаслаж, хөтчийн зааварчилгааг дагах.
• Зураг авахаасаа өмнө зөвшөөрөл авах эсвэл тэмдэглэгээг шалгах.
• Мөргөл, уламжлалт ёслолын бүсэд чимээгүй хүндэтгэлтэй байх.

Та Монгол улсаа төлөөлж байгаа хэдий ч НҮБ-ын олон улсын албан ёсны арга хэмжээг зохио байгуулж байгаа гэдгээ мөн санаарай.

• Төвийг сахих: Ажиллаж буй хугацаандаа улс төрийн үзэл бодлоо илэрхийлэхээс зайлсхийж, бүрэн төвийг сахина. Олон улсын хэлэлцээр, үндэсний байр суурь, бодлогын маргааны талаар хувийн бодол саналаа илэрхийлэхгүй.
• Нууцлал: Оролцогчдын нууцыг хүндэтгэнэ. Үйл ажиллагааны нууц мэдээллийг хуваалцахгүй, хурлын үр дүнгийн талаар таамаглахгүй.
• Албан ёсны суваг: Хэвлэл мэдээллийн байгууллагуудаас ирсэн асуулт, хүсэлтүүдийг COP17-ийн эрх бүхий төлөөлөгчид рүү шилжүүлнэ үү.

• Анхны сэтгэгдэл чухал: Халуун дулаан мэндчилгээ нь COP17-д хүрэлцэн ирсэн хүн болгоны тухайн өдрийн өнгө аясыг тодорхойлно.
• Ялгаатай байдлыг хүндэтгэх: Гадна төрх, хэл, гарал үүсэл дээр үндэслэн буруу таамаглал хийхгүй байх.
• Хариулт олоход туслах: Асуултын хариуг мэдэхгүй бол Мэдээллийн төв рүү дагуулж очих эсвэл ахлахтайгаа холбогдох.
• Халуун дулаан харилцааг мэргэжлийн байдалтай хослуулах.

Хурал дууссаны дараа зочид төлөөлөгчид барилга байгууламжийг мартаж болох ч Монголын ард түмэн тэднийг хэрхэн халуун дулаанаар угтан авсныг үргэлж санах болно.

Цэнхэр бүс (Blue Zone) нь НҮБ-ын аюулгүй байдлын дор ажилладаг хурлын албан ёсны бүс юм. Энд албан ёсны хэлэлцээрүүд, улс орнуудын павильонууд, хоёр талт уулзалтууд, нэгдсэн хуралдаанууд болон албан ёсны зэрэгцээ арга хэмжээнүүд явагдана. Зөвхөн итгэмжлэгдсэн оролцогчид ба зөвшөөрөлтэй ажилтнууд нэвтрэх эрхтэй.

• Аюулгүй ба баталгаатай үйл ажиллагаа
• Оролцогчдын саадгүй хөдөлгөөн
• Мэдээллийн үнэн зөв байдал
• Уулзалтын өрөөний найдвартай байдал
• Бүсийн бэлэн байдал
• Хүртээмжтэй ба тогтвортой байдлын өндөр стандарт

• Аюулгүй байдал ба нэвтрэх журам: Аюулгүй байдлын шалгалт заавал хийгдэнэ. Нэвтрэх эрхийг зөвхөн мандатаар зохицуулна. Аюулгүй байдлын журмыг алгасах эсвэл зөвшөөрөлгүй хүмүүсийг оруулж болохгүй.
• Уулзалтын өрөөний тохижилт: Уулзалтууд цагийн хуваарийг хатуу чанд мөрдөнө. Орц гарцыг чөлөөтэй байлгаж, зорчих хэсгүүдийн чимээг багасгаж, мэдээлэл технологийн (ICT) асуудал гарвал мэдээлнэ.
• Улс орнуудын павильон: Павильонууд бие даан ажиллах ч COP17-ийн бодлогыг мөрдөнө. Чиглэл заах, логистик, хүртээмжтэй байдлыг ханган ажиллана.
• Нууцлал: Цэнхэр бүс дэх зарим хэлэлцүүлгүүд нууцлалын зэрэглэлтэй байж болох тул мэдээллийн нууцлалыг хүндэтгэн хамгаалж, бусдад мэдээллийг задруулахгүй, хуваалцахгүй байх, уулзалтын үр дүнгийн талаар ямар нэг таамаглал дэвшүүлэн, хуваалцахгүй байхад анхаарна уу.

• Blue Zone: https://www.cop17bluezone.com/

Ногоон бүс (Green Zone) нь яриа хэлэлцээр өрнүүлэх, суралцах, инноваци, соёл ба олон нийтийн оролцоог дэмжих зорилготой олон нийтэд нээлттэй бүс юм. Иргэний нийгэм, залуучууд, эрдэмтэд, бизнес эрхлэгчид, иргэдийг үзэсгэлэн, соёлын тоглолтуудаар дамжуулан угтан авдаг.

• Зочдын сэтгэгдлийг дээшлүүлэх
• Олон нийтийн аюулгүй байдал ба цугларалтын зохицуулалт
• Тодорхой мэдээллийн үйлчилгээ
• Соёлын зочломтгой байдал
• Хүртээмжтэй ба тогтвортой байдлыг хангаж ажиллах

• Олон нийтийн харилцаа: Зочид төлөөлөгчид НҮБ эсвэл талбайн зохион байгуулалтыг мэдэхгүй байж болно. Арга хэмжээний байршил, хөтөлбөрийг энгийн, ойлгомжтой хэлээр тайлбарлаарай.
• Дараалал зохицуулалт: Их хүн цугларах хурал, илтгэлүүд дээр хүлээгдэж буй цагийг мэдээлж, ослын гарцыг чөлөөтэй байлгаж, хамгаалалтын ажилтнуудтай хамтран ажиллана.
• Тогтвортой байдлыг сурталчлах: Зочдод ус дүүргэх цэг ашиглах, хог ангилах, нэг удаагийн хуванцраас татгалзахыг уриалаарай.

• Green Zone: https://cop17greenzone.com/#official

Орох хаалга, хамгаалалтын пост, чиглэлийн автобусны зогсоол, мэдээллийн цэгүүдэд ажиллаж буй ажилтнууд дараах зүйлсэд анхаарна:

• Аюулгүй байдлын шалгалт: Шалгалтаар саадгүй, хурдан нэвтрүүлэх.
• Чиглэл заах: Төлөөлөгчид албан ёсны хурлаас олон нийтийн бүс рүү шилжихэд тодорхой чиглүүлэг өгөх.
• Тээврийн цэгүүд: Чиглэлийн автобусны хуваарийг мөрдүүлж ажиллах
• Ослын үеийн мэдээлэл: НҮБ болон эрх бүхий байгууллагуудын хооронд ослын хариу арга хэмжээг хамтран зохион байгуулах.

Зорилго: Бүх оролцогчдод зочломтгой, мэргэжлийн, шийдэлд чиглэсэн үйлчилгээг үзүүлэх.

• Оролцогчдыг халуун дулаанаар, идэвхтэй угтана.
• Хариулахаасаа өмнө асуултыг бүрэн сонсоорой.
• Асуултыг өөрийн асуудал шиг хүлээн авч, шийдэгдэх хүртэл анхаарал хандуулаарай.
• Боломжтой шийдлүүдийг санал болгох, шаардлагатай бол ахлахдаа дамжуулаарай.
• Эерэг, урамшуулсан үг хэллэг хэрэглэж, соёлын ялгааг хүндэтгэн үзнэ үү.

Зорилго: Оролцогчдыг талбай дотор саадгүй зорчиход нь үнэн зөв мэдээллээр чиглүүлэх.

• Хурдан шуурхай бөгөөд зөв чиглүүлэхийн тулд талбайн газрын зурагтай сайтар танилцаарай.
• Хөтөлбөрийн өөрчлөлтийг мэдэхийн тулд тухайн өдрийн хөтөлбөрийг өглөө бүр шалгаарай.
• Үндсэн үйлчилгээнүүдийн (Эмнэлэг, Хоол, Бие засах газар, Хэвлэл) байршлыг тодорхой мэдэж байх шаардлагатай.
• Тодорхой мэдэхгүй тохиолдолд таамаглаж, зөвлөгөө өгөхийн оронд албан ёсны эх сурвалж руу (App, Мэдээллийн төв) чиглүүлж өгөөрэй.

• Соёлын хөтөлбөрүүд
• https://culture.unccdcop17.org/
• Өдөр тутмын хөтөлбөрүүд
• Цэнхэр бүс: https://www.unccd.int/cop17/programme/agenda
• Ногоон бүс: https://www.cop17greenzone.com/schedule
• Гар утасны апп
• Зочдод зориулсан COP17 апп
• App store: apps.apple.com/…
• Google play: play.google.com/…

Бохирдол эсвэл цэвэрлэгээ, эрүүл ахуйн үйлчилгээ шаардлага үүссэн тохиолдолд онлайн хүсэлтийн маягтыг бөглөх эсвэл Дуудлагын төвтэй холбогдож шууд тусламж дуудаарай. COP17-ийн ажилтны хувьд таны анхаарал, сонор сэрэмж, идэвх санаачлага нь бага хурлын үйл ажиллагааг бүх чиглэлээр саадгүй явуулахад чухал нөлөөтэй.

• Онлайн хүсэлтийн маягт: https://cop-17.yutoflow.com/
• Дуудлагын төв: +976 7707-2217

Зорилго: Бүх багуудын хооронд цаг үеэ олсон, үнэн зөв, аюулгүй, мэргэжлийн харилцаа холбоог ханган ажиллах.

• Үйл ажиллагааны харилцаанд албан ёсны сувгуудыг (радио суваг, албан ёсны апп, ослын утас) ашиглана.
• Мэдээллийг дамжуулахаасаа өмнө шалгаж баталгаажуулна.
• Радио болон утсаар ярихдаа ёс зүйг сахих буюу товч, тайван, тодорхой, мэргэжлийн байна.
• Тохиолдсон асуудлыг журамд заасны дагуу шууд мэдээлнэ.

Аливаа эрсдэл мэдээллийг мэдэгдэхдээ дараах бүтцийг баримтлана.

Тохиолдлыг эхлээд илрүүлсэн ажилтан баримт, нөхцөл байдлыг ҮНЭН ЗӨВ дамжуулна. Эрсдэлийн зэрэглэлийг ЗӨВХӨН Эрсдэл, Шуурхай Удирдлагын Төв тогтоож баталгаажуулна. Баг, бүсийн ахлагч зэрэглэл тогтоохыг хориглоно. ЭРГЭЛЗЭЭТЭЙ ТОХИОЛДОЛД ИЛҮҮ ӨНДӨР ЗЭРЭГЛЭЛЭЭР АВЧ ҮЗНЭ.

Зорилго: Бүх оролцогч төлөөлөгчдийн ба ажилтнуудын аюулгүй байдал, эрүүл мэндийг хамгаалах.

• Өөрийн ажиллаж буй бүсийн ослын гарц, нүүлгэн шилжүүлэх замаа сайн мэдэж байх шаардлагатай.
• Аюултай нөхцөл байдлыг (халтиргаа, хаагдсан гарц, ил гарсан цахилгааны утас) Эрсдэл, Шуурхай Удирдлагын Төвд шууд мэдээлээрэй.
• НҮБ-ын аюулгүй байдлын болон аврагчдын зааварчилгааг шууд дагана уу.
• Баталгаагүй цуу яриа тараахгүй байх, зөвхөн баталгаажсан мэдээллийг хуваалцана уу.

• Яаралтай хариу арга хэмжээний төлөвлөгөө
• https://unccdcop17.org/evacuation-guideline

Зорилго: Бүх оролцогчдод саадгүй, адил тэгш, хүндэтгэлтэй оролцох боломжийг бүрдүүлэх.

• Хүртээмжтэй замуудыг элдэв ачаа, төхөөрөмж, тэмдэглэгээгээр хаахгүй чөлөөтэй байлгаарай.
• Далд хөгжлийн бэрхшээлийг ойлгож (жишээ нь: Аутизм) ажиллана уу.
• Тусламж хэрэгтэй хүнд найрсгаар тусламж санал болгоорой. Гэхдээ зөвшөөрөл авахгүйгээр өөрөө дур мэдэн тусламж үзүүлэхгүй.
• Хүртээмжтэй, хүндэтгэсэн үг хэллэг ашиглаарай.
• Тусгай хүсэлтүүдийг (сонсголын аппаратын төхөөрөмж, тэргэнцрийн тусламж) хүртээмжтэй байдлын төв рүү (Accessibility Desk) чиглүүлээрэй.

Зорилго: COP17-ийн нүүрстөрөгчийн ялгарал багатай, хог хаягдал багатай байх зорилтыг дэмжих.

• Цаасны хэрэглээг багасгах: Дижитал хөтөлбөр болон хурлын аппликейшнийг ашиглахыг уриалах.
• Хог хаягдлын менежмент: Хогийг зориулалтын саванд ангилан хаях.
• Нэг удаагийн хэрэгслээс татгалзах: Ус дүүргэх цэгүүдийг ашиглахыг уриалах.
• Эрчим хүч хэмнэх: Ашиглаагүй өрөөний гэрэл, дэлгэц, төхөөрөмжийг унтраах.

Үйл ажиллагааны салбар бүр тусгай журмын дагуу ажиллана. Техникийн дэлгэрэнгүй зааварчилгааг өөрийн харьяалагдаж буй баг, дэд хорооны гарын авлагаас авч, холбогдох албан хаагчаас тодруулна уу:

• Сайн дурынхан (Volunteers): Зочид төлөөлөгчдийг чиглүүлэх, олон нийтэд туслах, мэдээллийн ширээнд ажиллах.
• Лиаисонууд (Liaison Officers): VIP зочид, төлөөлөгчид, сайд нарт тусгайлан туслах.
• Бүртгэл ба Итгэмжлэл (Registration & Accreditation): Энгэрийн тэмдэг олгох, системд шалгах, нэвтрэх эрхийг хянах.
• Мэдээллийн үйлчилгээ (Information Services): Лавлах ширээ, асуултад хариулах, апп-ын дэмжлэг, өдрийн хөтөлбөр.
• Протокол (Protocol): Дипломат ёс зүй, VIP лоунжийн менежмент, суудал хуваарилалт, албан ёсны ёслолууд.
• Хэвлэл мэдээлэл (Media Operations): Хэвлэлийн төв, хэвлэлийн хурал, дамжуулалтын логистик.
• Тээвэр ба Логистик (Transport & Logistics): Автобусны зохицуулалт, цуваа, замын хөдөлгөөн, ачаа тээвэр.
• Кейтеринг (Catering): Хоолны бүсийн хяналт, хоолны дэглэм, хог багасгах, төлөөлөгчдийн хооллолт.
• ICT ба Техник туслалцаа: Сүлжээний дэд бүтэц, орчуулгын төхөөрөмж, кибер аюулгүй байдал.
• Талбайн үйл ажиллагаа (Venue Operations): Өрөөний бэлэн байдал, хөдөлгөөний урсгал, тэмдэглэгээ.
• Инженерчлэл ба Барилга: Цахилгаан, агааржуулалт, тайз засал, засвар үйлчилгээ.
• Цэвэрлэгээ ба Хог хаягдал: Эрүүл ахуй, тасралтгүй цэвэрлэгээ, хог ангилал.
• Эмнэлгийн үйлчилгээ: Анхан шатны тусламжийн цэгүүд, эмнэлгийн түргэн тусламж, тээвэрлэлт.
• Тогтвортой байдлын баг: Байгаль орчны аудит, ногоон стандартын хэрэгжилт.

Дагалдан явах ажилтан: Төлөөлөгчдийн тэргүүнийг нэг (1) албан ёсны ажилтан дагалдана.

• Шадар сайд болон түүнээс дээш зэрэглэлийн Төлөөлөгчдийн тэргүүнд Улаанбаатар хот дотор зорчих нэг (1) тусгай суудлын автомашин хуваарилна.
• Дагалдан явах ажилтнууд энгэрийн тэмдгээ үзүүлэн зочид буудал ба хурлын талбайн хооронд үнэгүй шаттл автобусаар зорчиж болно.

• Улаанбаатар хотод байрладаг ДТГ болон ОУБ-ын салбаруудад Гадаад харилцааны яамнаас (ГХЯ) нэг (1) машинаар нэвтрэх зөвшөөрөл олгоно. Автомашины мэдээллийг ГХЯ-ны Протоколын газрын Атташе Мөнххүслэнд хүргүүлнэ.
• Монголд Элчин сайдын яамгүй орнууд: Төлөөлөгчид машин түрээсэлж болох ч түрээсийн машинд нэвтрэх зөвшөөрөл олгох боломжгүй.
• Ерөнхий төлөөлөгчид: Бусад бүх албан ёсны төлөөлөгчид энгэрийн тэмдгээ үзүүлэн зочид буудал ба хурлын талбайн хооронд үнэгүй автобусаар зорчино.

• Шаардлага: Монгол Улстай визгүй зорчих хоёр талын хэлэлцээргүй орнуудын төлөөлөгчид орохоос өмнө виз мэдүүлнэ.
• Онлайн виз: https://isf.mn/en/service/visa-permit/cop17 порталаар мэдүүлнэ. (Баталгаажсан UNCCD бүртгэлийн бичгийг хавсаргана).
• Дэмжлэг: И-визтэй холбоотой асуултыг support@immigration.gov.mn мэйлээр асууна.

Төлөөлөгчдийн тэргүүний хоёр талт уулзалтын хүсэлтийг тухайн улсыг хариуцсан деск офицертой зөвшилцөж, ГХЯ-нд бүртгүүлнэ.

• Үндсэн холбогдох хүн: ГХЯ, Олон талт хамтын ажиллагааны газар, Нэгдүгээр нарийн бичгийн дарга Б.Мөнхчимэг
• И-мэйл: munkhchimeg@mfa.gov.mn

Тавтай морил! COP17-ийн сайн дурын ажилтны хувиар та зүгээр нэг арга хэмжээнд тусалж байгаа юм биш, дэлхийн тавцанд өөрийн хувь нэмрийг оруулах боломж нээгдэж байна. Төлөөлөгчид, дэлхийн манлайлагчид, эрдэмтэд, идэвхтнүүдийн хувьд та COP17-ийн нүүр царай байх болно.

Та дэлхийн өнцөг булан бүрээс ирсэн хүмүүстэй харилцана. Харилцаа бүр тань Монгол зочломтгой занг харуулах боломж юм. Эндээс олж авсан ур чадвар, найз нөхөд, туршлага тань бага хурал дууссаны дараа ч таны амьдралд хувь нэмэр үзүүлсээр байх болно.

• Өдөрт олон мянга алхах учраас хөлд эвтэйхэн гутал өмсөөрэй.
• Усны савтай ирж, ус дүүргэх цэгүүдийг ашиглаарай.
• Ачаалалтай байдаг тул амралтын цагаа сайн зохицуулаарай.
• Талбайн байршлыг сайтар цээжлээрэй. Хүмүүс танаас өдөржин чиглэл асууна.
• Албан ёсны аппликейшн болон газрын зургийг утсандаа татаж аваарай.
• Энэ бол хамтын зүтгэл, хамтын амжилт учраас багийн гишүүддээ санаа тавьж, туслаарай.
• Тэвчээр, нээлттэй байдал, инээмсэглэл таны хамгийн чухал зэвсэг байх болно.
• Энгэрийн тэмдгээ бахархалтайгаар зүүгээрэй.